Мамлекеттик тилдин майрамы белгиленди

Эл аралык Кувейт университетинде 23-сентябрь Мамлекеттик тил күнү салтанаттуу белгиленди.

Майрамдык  салтанат  мамлекеттик гимн менен ачылып, андан соң Баткен коогалаңында каза тапкандарды эскерүү минутасы жарыяланды.

-Мамлекеттик тилди ѳнүктүрүү  ар бирибиздин милдетибиз, ошондуктан эне тилибизди кадырлап, урматтайлы. Ар бирибиз ушул маанилүү ишке өз салымыбызды кошолу. Баардыгыңыздарды мамлекеттик тил күнү майрамыныздар менен куттуктайм,- деди Эл аралык Кувейт  университетинин ректору, педагогика илимдеринин доктору, профессор  Аскар Байсаркеев, майрамдык салтанатты ачып жатып.

Мамлекеттик тилдин күнүнө карата университте  студенттер арасында дубал гезиттердин жана “Менин өлкөм – менин тилим” аттуу дил баяндардын конкурсу уюштурулган. Салтанатта мына ошол конкурстардын жыйынтыктары чыгарылды. Дубал гезиттерди көркөмдөө конкурсу боюнча биринчи орунду кесиптик орто билим берүү бөлүмүнүн  чет тилдер кафедрасынын  ИЯ (ар)(к)2-22 тайпасынын студенттери ээлешти. ЭБ(к)1-21 тайпасынын студенттери экинчи, ПН(к)1-22 тайпасынын студенттери үчүнчү орунга татыды.

“Менин өлкөм – менин тилим” аттуу дил баян сынагында биринчи орунду коллеждин ПИ(к)1-22 тайпасынын студенти Жеӊишбек Самидин уулу   жеңип алды. Экинчи орунга ИЯ(ар-к)2-22 тайпасынын студенти Меридиана Айтикеева, үчүнчү орунга ИЯ(к)1-22 тайпасынын студенти Зухра Турсунбекова  татыктуу болушту. Конкурстардын жеңүүчүүлөрүнө жана иш чаранын активдүү катышуучуларына сыйлыктар жана мактоо баракчалары тапшырылды.

Эл аралык Кувейт университетиндеги мамлекеттик тил майрамынын көркүн чакырылган меймандар ачты. Манасчы, “Манас” театрынын артисти Нурбек Калыбек уулу Манастан  үзүндү айтып, төкмө акын Кутман Садыбакас уулу элибиздин өзгөчө өнѳрүн тартуулап,   студенттердин жана катышуучулардын  маанайын көтөрдү.

Андан тышкары  бул салтанатка  карата университеттин кесипттик орто  билим берүү бөлүмүнүн  биринчи курсунун студенттери өздөрүнүн концерттик программасын даярдаган. Университеттин босогосун быйыл аттаган студенттер  улуттук бий, тамаша-шоу, сценкаларды коюшуп, белгилүү кыргыз акындарынын ырларынан көркөм окушту. Кыргыздын улуттук музыкалык сыймыгы болгон комуздун шаңшыган үнү  жаңырды.

•